Lekeitioko Udalak herriko biztanleak Bilbora heltzeko behar duten denbora murrizteko egin zituen eskaerak betez, Ondarroatik Bilborako ibilbidea egiten duen zuzeneko Bizkaibus zerbitzuaren ordutegia aldatu du Bizkaiko Foru Aldundiak.

Aldaketa hori dela eta, Ondarroatik Bilborako zuzeneko zerbitzua egiten duen Bizkaibusak 06:30ean eta 07:30ean irtengo du Ondarroatik, eta horrela, ordu berean irtetzen duen Lekeitio-Bilbo linea erabiltzen duten pertsonek ibilgailu aldaketa egin eta Ondarroako linea hartzeko aukera edukiko dute Markina-Xemeingo geralekuan.

Ondarroa-Bilbo zuzenekoak Markina-Xemeingoa du azken geralekua, eta Gerediagatik joaten da zuzenean Bilboraino. Bidaiaren iraupena murrizteko. Lekeitiarrak Bizkaiko hiriburura 60 minutu baino gutxiagotan heltzeko helburuagaz Lekeitiotik Bilbora eta alderantziz egingo luken zuzeneko zerbitzua proposatu dio alde batetik, Lekeitioko Udalak aldundiari.

Lekeitiotik Bilbora 06:30ean eta 07:30ean irten eta Bilbotik 13:45 eta 18:45ean itzultzeko ordutegiak jartzea eskatu dio. Baina autobusak betetzen ez direla eta, Ondarroako zuzenekoagaz bat egitea erabaki du aldundiak. Bestalde, ibilbidea aldatzea ere izan da Lekeitioko Udalaren proposamena.