18Mon062018

Back ALBISTEAK LEKEITIO-KO ALBISTEAK 2018 Albisteak Bizkaiko I. Xendazaletasun Liga Lea-Artibain hasiko da

Bizkaiko I. Xendazaletasun Liga Lea-Artibain hasiko da

  • PDF fitxategia

Bizkaiko bidezidor guztiak berrikusi eta homologatu ditu aurten Bizkaiko Mendizale Federazioak, eta horiek guztiak ezagutzera eman eta erabilpena sustatu asmoz, Bizkaiko I. Xendazaletasun Liga antolatu dute herrialdeko mendigoizale taldeekin batera. Guztira 11 irteera izango dira, eta euretatik lehenengoa martxoaren 11n egingo da Ondarroatik Lekeitiora doan GR 123an zehar.

Markina-Xemeingo Artibai Mendigoizale Taldeak antolatuko du Bizkaiko birako lehen etapa, eta jakitera eman dutenez, “ibilbide oso erraza eta oso polita da, lau bat ordutan egiteko modukoa”.

Parte hartzaileak Lekeitiora joan beharko dira lehenengo, eta antolakuntzak autobusak jarriko dizkie Lekeitiotik Ondarroara heltzeko. “Horrela ibilbidea Lekeition amaitutakoan bertan hartu ahalko dituzte ibilgailuak berriro, etxera itzultzeko”, azaldu du Jabier Arrate Artibai Mendigoizale Taldeko kideak. Horrela, beraz, Lekeitioko plazan jarri dute hitzordua 09:00etan, autobusa hartzeko.

Ondarroatik berriz, 09:30ean irtengo dira parte hartzaileak, eta Kalatraba zubia izango dute abiapuntua. Bidea ondorengoa izango da: Ondarroa-Asterrika-Mendexa eta Lekeitio. Danetara 15 kilometro.

      GR 123 Ibilbidea      

Izena emateko. Parte hartzeko izena eman behar da aldez aurretik Bizkaiko Mendizale Federazioaren webgunean edo Artibai Mendigoizale Taldearen lokalean. Martxoaren 5era arte egongo da aukera. Federatuek 5 euro ordaindu beharko dute eta federatu gabeek berriz 8 euro, asegurua ere ordaintzeko. Federatuta dauden umeak ez dute ezer ordainduko, federatu gabeek ostera, aseguruarentzako 3 euroak ordaindu beharko dituzte.

Martxoaren 11n Lekeitio eta Ondarroa arteko GR 123 etapagaz hasi eta beste hamar edukiko dituzte aukeran xendazaleek familian edo lagunartean egiteko. Liburuxka bat emango diete, gainera, lehen etapan, eta parte hartzeagatik puntuak lortzen joango dira. Antolatutako irteeren herena egiten dutenek, opariak izango dituzte amaieran.

Bizkaiko I. Xendazaletasun Ligaren EGUTEGIA