26Thu042018

Back Noticias Noticias de Lekeitio Noticias 2018 Tximista Lekeitio atletismo taldeko infantil eta kadete mailako neskak Valentzian egon dira Espainiko txapelketan

Tximista Lekeitio atletismo taldeko infantil eta kadete mailako neskak Valentzian egon dira Espainiko txapelketan

  • PDF

Lekeitioko Tximista Atletismo Taldeko neskek 2. eta 3. postuak eskuratu dituzte asteburuan [apirilak 14 eta 15] Valentziako Luis Puig belodromoan (Herrialde Katalanak) lehiatu den Atletismoarekin Gozatuz jardunaldien finalean.

Lekeitioko atletismo taldeko bi taldek parte hartu dute finaletan: 2005ean jaiotakoak eta 2003-2004 urteetan jaiotakoak. “Biak bikain aritu dira, eta asko ikasi dute txapelketagaz, helburu nagusia taldearentzat”, nabarmendu dute Tximistako arduradunek.

Aiora Gojenola Gorostola, Alaine Imaz Kortazar, June Markes Rodriguez, Nora Agirre Castro eta Olatz Sustaeta Martinezek osatu dute 2003-2004 urteetako nesken taldea, eta lehenengoarengandik 33 puntura, Espainiako azpitxapeldun gelditzea lortu dute. Horrez gain, bi proba irabazi dituzte. “Aiora Gojenolak 1.500 metroko martxa eta Alaine Imazek altuera jauzia. Gainera, ia denek euren markak hobetu dituzte”.

2005 urteko neskek, berriz, 3. postua eskuratu dute. Talde hori Leire Alonso Kortazarrek, Maialen Caceres Alberdik, Naia Garetxana Urkidik eta Nora Zatika Belaustegik osatu dute. “Txapelketara 6. lekuan sailkatu ziren, baina finalean zoragarri aritu ondoren podiumera igotzea lortu dute”.

Atletismoagaz gozatzeagaz gainera, lagun berriak egin, esperientzia berriak bizi eta leku berriak ezagutzeko aukera izan dutela azpimarratu dute Tximistako arduradunek.